سؤال وجواب عن المياه البيضاء ؟
1- هل ممكن علاج المياه البيضاء بإستخدام أدويةاو قطرات معينه او علاجها بالليزر ؟
العلاج الوحيد للمياه البيضاء بيكون بإجراء عملية بنستبدل فيها العدسة المعتمه بعدسة صناعية تكون بمواصفات قريبه من العدسة الطبيعية , واللي بيختلف في العملية هو طريقة إزالة العدسة وبتكون اما جراحيا او بالموجات فوق الصوتية او بالفيمتو ليزر وبيتم الاختيار بين ال 3 طرق علي حسب المرحلة اللي وصلها المرض .
2- ايه هي انواع العدسات اللي بتتزرع في عملية المياه البيضاء ؟
في ثلاثة انواع من العدسات اللي بتتزرع في عملية المياه البيضاء :
1- عدسة بتغني المريض عن نضارة المسافات فقط .
2- عدسة بتغني المريض عن نضارة المسافات والقراءة مع بعض .
3- عدسة بتغني المريض عن نضارة المسافات والقراءة وتصلح الاستجماتيزم .
3- ايه الوقت المناسب لاجراء عملية المياه البيضاء ؟
زمان كنا بنستني لحد ماتوصل المياه البيضاء لدرجة كبيره من العتامه وتكون رؤية المريض غير واضحه تماما وبعدين نشيلها لكن دلوقتي مع الطرق الحديثة كل ماتم علاجها في بداية المرض كل ماكانت العملية اسهل وافضل وامان اكتر والتأخير في اجراء العملية بيخليها اكثر صعوبة .
4- عملية المياه البيضاء بتستغرق وقت اد ايه وهل بتحتاج لبنج كلي ؟
عملية المياه البيضاء بيستغرق اجراءها 5 دقايق , و البنج بيكون موضعي مبتحتاجش لبنج كلي الا في حالات معينه والمريض بيقدر يخرج بعدها علي طول من المستشفي .
5- هل المياه البيضاء ممكن ترجع تاني ؟؟
لاء المياه البيضاء مبترجعش تاني بعد اجراء العملية .